बैंकक । अमेरिकी राष्ट्रपति डोनाल्ड ट्रम्पले शनिबार कम्बोडिया र थाइल्याण्डका नेताहरूसँग फोनमा कुरा गर्दै सीमामा जारी झडप तत्काल रोक्न आग्रह गरे पनि सीमा क्षेत्रमा गोलाबारी जारी रहेको छ। 

ट्रम्पले ट्रुथ सोसलमा लेखेका थिए, ‘दुवै राष्ट्रले तत्काल भेट्न, छिटो युद्धविराम गर्न र अन्ततः शान्ति कायम गर्न सहमत भएका छन्।’

दुवै देशले ट्रम्पको चासो र प्रयासका लागि धन्यवाद व्यक्त गरेका छन्। कम्बोडियाले युद्धविरामको ट्रम्पको अनुरोध स्वीकार गरेको छ, जबकि थाइल्याण्डले दुई देशबिच वार्ताको आवश्यकतामा जोड दिएको छ।

कम्बोडियाका प्रधानमन्त्री हुन मानेटले ट्रम्पलाई कम्बोडिया उनको ‘दुवै सशस्त्र सेनाबिच तत्काल र बिना सर्त युद्धविरामको प्रस्तावसँग सहमत’ रहेको स्पष्ट पारे। उनले ट्रम्पको मध्यस्थताले ‘धेरै सैनिक र नागरिकको जीवन बचाउन साँच्चै मद्दत गर्नेछ’ भन्ने विश्वास व्यक्त गरे। कम्बोडियाले आफ्नो सेना थाइल्याण्डको भन्दा कमजोर भएको र थाई तोपखाना तथा हवाई हमलाबाट आफ्नो जमिन र उपकरण गुमाउँदै आएको छ।

थाइल्याण्डका कार्यवाहक प्रधानमन्त्री फुम्थाम वेचचायाचाईले ‘राष्ट्रपति ट्रम्पलाई उनको चासोका लागि धन्यवाद’ दिँदै ‘थाइल्याण्ड युद्धविराम गर्न सैद्धान्तिक रूपमा सहमत भएको’ बताए। यद्यपि, थाई विदेश मन्त्रालयले जारी गरेको विज्ञप्तिमा थाइल्याण्डले कम्बोडियाबाट ‘इमानदार नियत’ हेर्न चाहेको र पहिले वार्ता हुनुपर्ने आफ्नो पुरानो अडानमा कायम रहेको उल्लेख छ।

जुलाई २४ मा सुरु भएको यस झडपमा हालसम्म कम्तीमा ३३ सैनिक र नागरिकको ज्यान गएको छ। यसैगरी, हजारौँ थाई र कम्बोडियाली नागरिक विस्थापित भएका छन्।