काठमाडौँ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले जनयुद्धको ऐतिहासिक तथ्य र उचाइलाई आत्मसात् गर्न अपिल गरेका छन् । 

शुक्रबार पार्टी कार्यालयमा संविधान दिवसका अवसरमा आयोजित कार्यक्रमलाई सम्बोधन गर्दै प्रचण्डले यस्तो बताएका हुन् । उनले जेनजी आन्दोलनका कारण यो पटकको संविधान दिवस फरक ढंगले मनाइरहेको बताउँदै यो नै मौलिकता र विशेष रहेको पनि बताए । 

‘यतिवेला हामी ११ औँ संविधान दिवस मनाउँदै छौँ, त्यो विशेष तरिकाले मनाउँदै छौ । जेनजी आन्दोलनका कारण उत्पन्न नयाँ राजनीतिक परिस्थितिका बिचमा संविधान दिवस मनाउँदै छौ’, प्रचण्डले भने, ‘यही नै मौलिकता र विशेषता हो भन्ने लागको छ ।’

पूर्वप्रधानमन्त्री समेत रहेका प्रचण्डले संविधान सभाबाट संविधान बनाउने ठाउँमा आइपुग्न झन्डै ७० वर्ष भन्दा लामो यात्रा तय गर्नुपरेको पनि बताए ।